A Secretaría Xeral para o Turismo, a través do
Instituto de Estudos Turísticos de
Galicia, ven de pór en funcionamento un estudo para coñecer o perfil e o gasto
dos viaxeiros de cruceiros en Galicia.
O sector dos cruceiros moveu no ano 2011 un
total de 392.051 pasaxeiros e leva contabilizado nos primeiros nove meses deste
ano 291.171, segundo datos de Portos do Estado. O turismo de cruceiros en
Galicia conta cunha marxe de crecemento importante e a través de estudos
específicos como este proxecto piloto que se desenvolverá ao longo deste último
trimestre de 2012 poderá coñecerse máis polo miúdo o perfil do viaxeiro de
cruceiros en Galicia e atender ás necesidades da demanda que este sector xera.
Así, o estudo consiste na realización de 3.000
enquisas a viaxeiros que desembarquen nos portos da Coruña e Vigo. Realizaranse,
cen enquisas por cruceiro escollidas de xeito aleatorio de entre os trinta
cruceiros seleccionados, entre os que figuran nomes como o Independece of the Seas ou o Queen
Elizabeth.