A Consellería do Medio Rural e do Mar vén de
publicar no DOG a nova orde pola que se regulan as tallas mínimas de extracción
de distintas especies de peixes, moluscos, crustáceos e equinodermos. Esta nova
orde modifica o tamaño mínimo de determinadas especies seguindo a información
de estudos realizados e a evolución dos mercados e ten como obxectivo
harmonizar a normativa autonómica coa nacional e comunitaria.
Unha das
principais novidades que engade é a posibilidade de que en determinadas zonas
de Galicia, o tamaño mínimo da ameixa babosa sexa de 35 mm, en lugar dos 38 mm
que establece a normativa comunitaria. Ademais redúcese a talla mínima do
berberecho de 28 a 25 mm en toda Galicia.
Esta
normativa esténdese á extracción en augas de competencia da Comunidade Autónoma
de Galicia e á comercialización das especies no territorio galego referidas
nesta orde. En canto aos peixes cabe destacar que a normativa non será de
aplicación a aqueles que proceden da acuicultura. Mentres que para os moluscos
os tamaños mínimos que establece a orde tamén serán de aplicación aos
procedentes da acuicultura.
Ademais a
orde inclúe indicacións para realizar a medición axeitada das distintas
especies e especifica que as especies capturadas que non acaden o tamaño mínimo
regulamentario deberán ser devoltas inmediatamente ao mar, no caso de ser
posible, ou ben deberá actuarse conforme
ao establecido na Lei de pesca de
Galicia. O documento tamén especifica que a Consellería do Medio Rural e do Mar
poderá autorizar, dentro das augas da súa competencia, a extracción ou captura
de individuos de tamaño inferior ao establecido na orde con fins de
repoboación, traslados e sementeiras, así como aqueles outros exclusivamente
científicos, culturais ou didácticos. O incumprimento desta orde será
sancionado de conformidade co establecido na Lei de pesca de Galicia.