As liñas de traballo
que atinxen a aspectos socieconómicos, como os desenvolvidos polos Grupos de
Acción Costeira (GAC), xogarán un papel de gran importancia no Fondo Europeo
Marítimo e da Pesca (FEMP). Díxoo o secretario xeral do Mar, Juan Maneiro, na
inauguración do Foro de boas prácticas en Grupos de Acción Costeira, que
se celebra en Oleiros e na que participan os xerentes dos sete
grupos constituídos en Galicia.
O secretario xeral puntualizou que o novo
FEMP, que aínda se está a negociar, se centrará nas persoas e comunidades
dependentes da pesca, promovendo a estas entidades e co fin de impulsar
proxectos que garantan a dinamización das zonas costeiras, entre eles galegas. Así,
a través de axudas económicas, favorecerase a competitividade das zonas de
pesca, impulsarase o valor engadido dos produtos pesqueiros e axudarase a
pequenas infraestruturas e servizos relacionados con este ámbito.
O goberno galego considera que os GAC son
claves para promover o desenvolvemento sostible nas zonas de pesca, para manter
e promover o emprego, fomentar a calidade do medio costeiro e promover a
cooperación nacional e transnacional entre zonas de pesca.