O Teatro Teatriz en Madrid acolleu a pasada noite
unha presentación sobre a gastronomía de Galicia a modo de showcooking
protagonizado polos restauradores do Grupo Nove. Gastronovena é o nome deste
evento co que a asociación gastronómica celebrou o seu décimo aniversario. O
acto reuniu a profesionais da alta cociña, representantes de asociacións e
grupos gastronómicos, personalidades do eido empresarial ligadas ao sector
culinario e da alimentación así como medios especializados e xeralistas,
plataformas de difusión ligadas á gastronomía e bloggers especializados.
Este evento promocional contou tamén coa
colaboración da Secretaría Xeral para o Turismo e mais das Denominacións de
Orixe Protexida vitivinícolas de Galicia, así como de Hijos de Rivera e
Estrella Galicia. En representación da Admnistración Turística galega asistiu
Elena Barca Ramos, a subdirectora de Xestión, Fomento e Cooperación da
Secretaría Xeral para o Turismo, que foi a encargada de facer un repaso polos
recursos culinarios da Galicia gastronómica.
Elena Barca resaltou na súa intervención
a importancia de celebrar “unha década de éxito dun grupo de mozos profesionais
innovadores e emprendedores”. “Os nove grandes cociñeiros que iniciaron a
andaina do Grupo Nove téñense convertido na actualidade en 22 profesionais
entusiastas, que son a vangarda da cociña galega”, resaltou.