A Xunta de Galicia a través da Secretaría Xeral para o Turismo ven de
acometer unha obra de remodelación do miradoiro de Sober. Os traballos, cuxo
orzamento ascendeu a 113.059 euros, comezaron en xuño e hoxe mesmo
recepcionouse a obra. No acto de recepción estiveron presentes o alcalde de
Sober, Luís Fernández Guitián e mais a xefa de servizo da Xefatura Territorial
da Delegación da Xunta de Galicia en Lugo, Paloma Vázquez Fernández.
As obras executadas tiveron como obxectivo a reforma e ampliación do
miradoiro do Canón do Sil, creando unha estrutura voada orixinal sobre a xa
existente, para poder gozar dun contorno destacado turísticamente. O miradoiro
preexistente foi substituído por unha plataforma de madeira e aceiro cortén
deseñada con criterio escultórico. A instalación está realizada de xeito que
permita apreciar mellor as sensacións visuais e sonoras que caracterizan a
paisaxe da Ribeira Sacra.