A Xunta de Galicia, a través de Turgalicia, da Secretaría Xeral para o
Turismo, promociona ao longo desta semana o destino turístico Galicia en
Brasil, un dos mercados emisores con máis capacidade de crecemento para a
Comunidade galega.
Deste xeito, técnicos de Turgalicia participaron onte na xuntanza de
traballo celebrada en Sao Paulo, Wide
2012, na que a oferta do Turismo galego puido presentárselles a 50
operadores turísticos do país americano.
Ademais, neste evento de promoción turística desenvolveuse unha exposición
dos produtos e o destinos turísticos galegos dirixida a operadores e axentes
turísticos, que foi visitada por máis de 1.200 profesionais brasileiros.
Do mesmo xeito, dende mañá ata o vindeiro día 26 de outubro, a cidade de
Río de Janeiro acollerá a feira turística que se celebra con motivo do congreso
anual da Asociación Brasileira de Axencias de Viaxes (ABAV).
Os turistas brasileiros supuxeron en 2011 o 5.08 % do total dos turistas
internacionais que recibiu a Comunidade galega, situándose en terceiro lugar
dos iberoamericanos, logo dos arxentinos e os venezolanos.