Galicia rexistrou no mes de setembro un
notable crecemento do turismo internacional, que medrou un 14,9%, acadando máximos
históricos no mercado estranxeiro, tanto en viaxeiros aloxados (113.417) como
en pernoitas (190.455), segundo datos facilitados polo Instituto Nacional de
Estatística (INE).
En canto á demanda rexistráronse un total de 366.366
viaxeiros aloxados en establecementos hoteleiros no mes de setembro. As pensións
amosan unha tendencia positiva, cun 1% máis de viaxeiros aloxados que os
rexistrados o ano pasado no mes de setembro.
No acumulado do ano, o período que vai de
xaneiro a setembro, o crecemento do turismo internacional no sector hoteleiro
subiu un 1,5% no relativo a viaxeiros aloxados, con 617.363, máximo histórico
na comunidade. A suba nas pernoitas de turistas estranxeiros en establecementos
hoteleiros entre xaneiro e setembro de 2012 foi do 0,3%, con 1.083.932
pernoitas rexistradas.
Durante este período o peso do turismo internacional no sector hoteleiro
foi do 23,9%, máximo histórico en Galicia, que se traduce nesa suba dos 1,5
puntos porcentuais en relación ao mesmo período do ano pasado, segundo datos do
INE. Trátase da porcentaxe máis elevada dende que se teñen rexistros,
concretamente no ano 1.999.