O recinto do Mercado Gandeiro da Fonsagrada
acolle este sábado o tradicional certame de gando vacún, no que se agarda a
participación de preto de 200 reses de rubia galega e asturiana, todas elas
procedentes de explotacións locais. Como é habitual, as casas comerciais do
municipio e organismos oficiais colaboran co concurso donando diferentes
trofeos para os vencedores nas diferentes categorías e que se suman aos 3.500
euros que o propios Concello destina aos premios en metálico. Entre os
galardóns ao mellor exemplar de vaca, de touro, de lote de xatos, etc. destaca
o especial que se entrega ao primeiro e segundo clasificados na categoría do
mellor lote, que deberá estar composto por un mínimo de 7 vacas e un touro.
Ao igual que outros anos, Acruga tamén aporta
á exhibición un lote de espectaculares animais, composto por un semental e seis
xovencas.