Santiago de Compostela acollerá, a partir
do 20 de setembro, o congreso de clausura do proxecto ‘I-Speed. Information
Society Policies for Sustainable European Economic Development’, unha
iniciativa cofinanciada pola Unión Europea a través do Programa Interreg IV-C
na que participa Galicia xunto con outros nove socios de nove países europeos. Ao
longo desa xornada, no Hostal dos Reis Católicos, preto de cincuenta
representantes políticos e membros dos órganos de promoción turística de
Venecia; o condado de Hedmark, en Noruega; Varsovia; Creta; o condado de Powys,
no Reino Unido; Bucarest; a provincia de Roma, a Asociación Nacional de
Municipalidades da República de Bulgaria; a comunidade urbana de Nantes, e
tamén Galicia, reuniranse para analizar as mellores prácticas europeas na
aplicación de novas tecnoloxías no sector turístico, co obxectivo de favorecer
a súa transferencia e a implantación en novos destinos.
Entre esas prácticas, a Secretaría Xeral
para o Turismo presentou a Central de Reservas Online de Turismo Rural de
Galicia, unha ferramenta informática para a xestión das reservas dos
establecementos rurais de Galicia. Segundo indica a Xunta, o condado de Hedmark
estaría estudando a posibilidade de implantar este sistema no seu territorio.