Pazo Baión, negro sobre branco

Presentación do libro, coa presenza de
César Portela, Xosé Fortes e José Hidalgo

As instalacións do Pazo Baión, en Vilanova de Arousa, acolleron a presentación do libro que recolle a historia deste proxecto enolóxico e paisaxístico. O arquitecto César Portela, o historiador Xosé Fortes e o enólogo José Hidalgo foron os encargados de amosar o resultado final do traballo, no que narran as súas propias vivencias e vencellos co Pazo Baión. 

O traballo de recompilación da memoria histórica foi realizado por Xosé Fortes, quen sitúa as orixes da finca no século XV. Dende entón, e ata o século XX, a historia do Pazo Baión estivo protagonizada por familias nobres como os Sarmiento ou os Figueroa. A finais do século XX o Pazo Baión era coñecido en todo o país polo seu vencello co mundo do narcotráfico, algo que, trala chegada de Condes de Albarei, mudou definitivamente.

Hoxendía, Pazo Baión é sinónimo de labor social, non en van o 5% das vendas destínanse anualmente a programas de axuda a drogodependentes. Ademais, contrata a extoxicómanos en proceso de reinserción socio-laboral. Un proxecto con pasado, presente e futuro que, agora, se recolle nun libro.