Carmen Pardo supervisa a rede de Pousadas da Deputación de Pontevedra


A secretaria xeral para o Turismo, Carmen Pardo, e mais o presidente da Deputación de Pontevedra, Rafael Louzán, visitaron as obras dunha das futuras Pousadas do Salnés, que se espera entren en funcionamento en breve. En total, construiranse catro establecementos caracterizados pola súa accesibilidade en Meaño, Armenteira, Ribadumia e A Lanzada.

Nestes momentos estanse iniciando os traballos de internacionalización e comercialización do produto turístico, dado que se prevé que os traballos de construción dos inmobles finalicen este mesmo ano.

Durante a visita, a secretaria xeral para o Turismo explicou que a consecución dunha maior accesibilidade turística en Galicia constitúe un dos principais retos da Administración, xunto coa diferenciación, a desestacionalización turística, o incremento do gasto medio e a estadía media ou o aumento da cota de turismo internacional. Segundo explicou Carmen Pardo, “en España existen catro millóns de persoas con diversidade funcional e en Europa a cifra supera os cincuenta millóns”, de xeito que implementar medidas que incentiven a accesibilidade constitúe, sobre todo, un “acto de xustiza cidadá”, sentenciou.