A Deputación de Pontevedra presentou o Plan
Director do Monte Santa Trega (A Guarda), que establece as liñas básicas de
actuación para a recuperación, conservación e revitalización deste espazo, por
medio de 30 propostas de actuación que requirirán dun investimento global de 19
millóns de euros. O director do Plan é o arquitecto Mario Crecente.
A primeira das actuacións deste plan consistirá
na mellora da estrada de acceso e na dotación dos servizos de abastecemento de
auga e saneamento. Así mesmo, incluirá a canalización da rede de subministro
eléctrico e a eliminación dos postes e torretas que afean a paisaxe e que son
un dos principais motivos de queixa dos visitantes. A maiores, o plan propón
actuacións en materia paisaxística, patrimonial, de divulgación e de creación
de mellora de servizos. Xa no propio castro, proponse crear unha Sala da
Paisaxe no Restaurante Panorámico Jurado.
Santa Trega é o 2º lugar máis visitado de
Galicia, só detrás de Santiago de Compostela, e segue a ter máis visitas ao ano
que as covas de Altamira, Covadonga ou o Museo de Arte Romano de Mérida,
segundo sinalou Mario Crecente.