Este martes celebrouse no Balneario de
Mondariz a primeira reunión do Comité de Expertos do proxecto Aquaturnat, integrado
pola Fundación Mondariz Balneario, Augas de Galicia, a Cámara de Viana do
Castelo e mais a Cámara de Paredes de Coura. A secretaria xeral para o Turismo,
Carmen Pardo, forma parte dese Comité científico. Outros membros son Ramón
Núñez Centella, director do museo Nacional de Ciencia e Tecnoloxía; Patricia
Barciela, directora da Domus-Casa del Hombre da Coruña; Jorge Duarte Vázquez,
presidente-decano do Colexio Oficial de Arquitectos de Galicia; Juan Ramón Vidal
Romaní; catedrático de Xeoloxía da USC e director do Instituto Universitario de
Xeoloxía Isidro Parga Pondal; John Walton, director de Journal of Tourism
Historiy do Grupo editorial Taylor & Francis e catedrático de Historia pola
Universidade de Oxford; Luís Rodríguez Míguez, membro da Real Academia de
Medicina e Cirurxía de Galicia; Francisco Arecheaga, presidente da Cámara
Mineira de Galicia; Miguel Delibes de Castro, do CSIC; e mais Felipe Criado
Boado; director do Instituto de Ciencias do Patrimonio do CSIC.
No marco deste proxecto levaranse a cabo
diversas accións como a creación do Museo Virtual da Auga, así como a
proxección e difusión internacional do proxecto en particular e do termalismo
galego en xeral a través da prestixiosa editorial británica Taylor &
Francis Group, tanto para o desenvolvemento turístico do territorio como para o
desenvolvemento sostible do mesmo e a súa proxección e mellora continua para o
sector.
Carmen Pardo sinalou que “cómpre que exista
unha conciliación entre o que significa aproveitar turísticamente un territorio
e a preservación do ambiente”. “O desenvolvemento sostible dun territorio
turístico –engadiu- non implica que a empresa turística vexa reducidos os seus
beneficios, senón que desencadea factores positivos que crean sinerxias en
canto ao incremento de negocio e proxección de novos mercados”. Pardo comentou
tamén na súa intervención que Turismo de Galicia traballa neste momento nos
Produtos Cabeceira da Marca Galicia, entre os que se encontra Mananciais de
Galicia, que pon en valor a oferta de turismo de saúde e benestar da nosa
comunidade.