O Oratorio de Santa Cecilia, un oratorio
barroco de gran valor artístico, na cidade italiana de Perugia, acolleu esta
fin de semana o ‘Encontro Compostelano en Italia’, que se celebra nesta cidade
da rexión de Umbria dende hai 24 anos e que supón xa unha cita ineludible para
os estudosos e investigadores do Camiño de Santiago. A Confraternita di San
Jacopo di Compostella é a parte da organización que se encarga do asociacionismo
do Camiño en Italia. Áparte, ocúpase tamén de prover de credenciais a todos os
peregrinos italianos que cada ano camiñan ata Compostela, non en van, Italia é
o segundo país en número de peregrinos estranxeiros a Santiago.
Ao acto inaugural do encontro acudiu o
conselleiro delegado da S.A. de Xestión do Plan Xacobeo, Andrés González Murga,
e mais a técnico da sociedade encargada do departamento de Asociacionismo e
Investigación Xacobea, Rosa Vázquez. González Murga agradeceu na súa
intervención o traballo levado a cabo nas últimas décadas pola Confraternita e o Centro di Studi
Compostellani e resaltou a gran labor científica e investigadora do mesmo, o
magnífico traballo no eido da investigación xacobea que segue a desenvolver e
tamén manifestou o apoio da Xunta de Galicia á investigación xacobea e o
interese do Xacobeo en seguir traballando e colaborando co asociacionismo
xacobeo e coa investigación sobre o culto ao Apóstolo. Dende Galicia enviouse ao encontro material
informativo das rutas xacobeas e tamén de Galicia como destino turístico.