O Consello Regulador da D.O. Ribeiro
entregará o vindeiro 21 de xuño os Premios Ribeiro 2012. Distinguiranse, así,
aos viños mellor valorados da colleita 2011, na modalidade de brancos, e do
2010 e 2011, en tintos. Ademais, farase un recoñecemento a profesionais
destacados do mundo da comunicación e da hostalería, “pola súa contribución á
mellora do noso sector”, informa o Consello.
Así, estes días iníciase a toma de mostras
dos viños participantes na Cata Oficial, a cargo do persoal técnico do
Consello. Todas as mostras serán avaliadas nunha precata por un panel
profesional, da que resultarán os finalistas. Entre eles, disputaranse un único
premio por categoría (Mellor Branco de Adega, Mellor Branco de Colleiteiro e
Mellor Tinto).
No tocante ás novas modalidades de premios
(Mellor Tarefa de Comunicación sobre o viño, Mellor Servizo do Viño no
restaurante, Mellor Tenda Especializada-Viñoteca, Mellor Taberna-Bar de Viños e
Persoeiro de Honra) serán as adegas do Ribeiro as encargadas da elección. Tras
unha primeira fase de nomeamentos, xa concluída, catro finalistas propostos
polas adegas compiten en cada unha das categorías. A entrega de premios
celebrarase no Mosteiro de San Clodio.