O presidente da Xunta sinalou que “nas
próximas semanas” será presentado un dos compromisos asumidos polo seu Goberno
nesta lexislatura: a Axencia Galega de Turismo. Feijóo fixo este anuncio na
inauguración do foro ‘O futuro do Turismo en Galicia’, organizado por El Correo
Gallego, ao tempo que incidiu en que este novo órgano aglutinará “todos os
organismos que entenden de turismo nun único, pervivindo e persistindo, por
suposto, o Xacobeo”.
Alberto Núñez Feijóo sinalou que a aposta “decidida”
por unha oferta turística “coordinada e diversa” permite unha maior resistencia
do sector fronte á crise. Precisamente, referiuse a que “un dos principais
éxitos turísticos de Galicia, o Xacobeo, xurdiu en plena deflación económica e
en medio dunha gran incerteza”, polo que avogou por “non interromper ese gran
exemplo pese aos pésimos tempos, dende o punto de vista económico, que nos toca
vivir”.
O presidente garantiu o “compromiso” de
seguir traballando co sector “para saber temperar as esixencias actuais” e
destacou que as nosas posibilidades turísticas teñen a súa maior fortaleza no
feito de que somos “unha unidade diversa”.