O Diario Oficial de Galicia recolle hoxe varias
resolucións da Secretaría Xeral para o Turismo en referencia a senllas ordes de
axudas. A primeira delas establece as bases reguladoras para a concesión de
subvencións ás axencias de viaxes para a promoción e comercialización do
destino Galicia. Considéranse proxectos subvencionables para esta orde todos
aqueles que se encadren na liña de deseño de paquetes turísticos de nova
configuración. Valoraranse especialmente aqueles paquetes que se configuren
sobre os produtos Cabeceira de Marca de Galicia e tamén aqueles que estean
orientados ao turismo de caza e pesca, turismo de golf e turismo
náutico-fluvial. Ou ben aqueles que se encadren nunha segunda liña, que é a de
produtos existentes renovados que impulsen a innovación e renovación en
produtos tradicionais ou envellecidos; que inclúan un desenvolvemento
transversal de produtos de natureza, culturais e enogastronómicos, así como
dobres produtos, integrando termalismo, golf ou outras actividades
complementarias; ou que desenvolvan ferramentas ou aplicacións web para a
promoción e comercialización dos produtos en sitios web propios ou de
terceiros, específicos dos produtos desenvolvidos. A orde está dotada con
300.000 euros e as actuacións subvencionables poderán acadar un máximo de axuda
de ata o 40% do orzamento subvencionable.
No tocante á orde destinada a actuacións de
mellora dos acampamentos turísticos de Galicia, o montante total ascende a
100.000 euros.
Por outra banda, publícanse outras dúas resolucións
de subvencións, unha delas destinada a incentivar o turismo mediante a mellora
de albergues turísticos xa existentes en Galicia (pioneira na Comunidade) e a
outra, aos establecementos de turismo rural, establecementos hoteleiros,
apartamentos e vivendas turísticas, campamentos de turismo, axencias de viaxes,
cafeterías, bares, restaurantes e empresas de servizos turísticos
complementarios nos procesos de certificación, seguimento e renovación das
correspondentes normas UNE co obxecto da obtención ou mantemento da marca Q de
Calidade Turística do Instituto para a Calidade Turística Española.