Dúas citas gastronómicas: a XIV Feira Degustación da Tenreira Galega de Láncara e a LII Festa da Lamprea de Arbo
A Deputación de Lugo impulsa a XIV Feira
Degustación da Tenreira Galega de Láncara, que terá lugar este martes, a partir
das 10:00 horas, no Campo da Feira da Pobra de San Xillao. Nela está previsto
repartir uns mil quilos de carne entre os asistentes.
Xunto á degustación de tenreira galega, ao
caldeiro ou á grella, a 12 euros por ración, a programación do evento inclúe
actuacións musicais, exhibicións de maquinaria agrícola clásica e de produtos
artesáns, o sorteo dunha xovenca, e un concurso de gando vacún e outro de
cabalos.
E a outra cita gastronómica para os
vindeiros días é a LII Festa da Lamprea de Arbo (Pontevedra). Os días grandes
serán do 4 ao 6 de maio pero os actos previos xa comezaron. Para este martes
está prevista a inauguración da Viñoteca Municipal no Centro do Viño e de
Interpretación da Lamprea, coa presenza de representantes do C.R.D.O. Rías
Baixas. O mércores e xoves desenvolveranse unhas Xornadas Técnicas de Viticultura
e xa o venres procederase á inauguración oficial da Mostra e Degustación da
Lamprea e do Viño da D.O. Rías Baixas.
Como actos destacables, o venres
celebrarase a Gala da Lamprea e o sábado, o Xantar de Homenaxe á Raíña Lamprea
e ós viños de Arbo.