A Deputación de Pontevedra reivindica o apoio ao emprego no sector termal do seu programa ‘Saúde e Benestar’

A Deputación Provincial de Pontevedra pon en marcha, un ano máis, o programa ‘Saúde e Benestar’, co que se pretende, por un lado, “contribuír a mellorar a calidade de vida das persoas de máis de 50 anos ou necesitadas dun respiro familiar e, por outro, dinamizar o sector termal nos meses de temporada baixa, co que se logra o mantemento duns 400 postos de traballo na provincia”. Así o asegurou esta mañá o presidente da Deputación provincial de Pontevedra, Rafael Louzán, na rolda de prensa posterior á Xunta de Goberno, que aprobou hoxe a adxudicación dos traballos de organización deste programa.

Nos tres últimos anos, unhas 10.000 persoas beneficiáronse deste programa e o obxectivo da Deputación é que poidan seguir facéndoo para que tamén sexa un “estímulo para que estas instalacións que xeran riqueza e emprego” manteñan a súa actividade e os seus postos de traballo, especialmente necesarios en momentos coma o actual. Louzán lembrou que o programa consiste en que as persoas interesadas poidan pasar 6 días e 5 noites nun hotel con spa, balneario ou outro tipo de instalación similares, en réxime de pensión completa. Todos os establecementos incluídos no programa pertencen á provincia de Pontevedra, porque do que se trata e de que “os recursos que hai na provincia se gasten na provincia”.