Solla imparte docencia sobre o envasado ao vacío

O cociñeiro Pepe Solla, que conta cunha estrela Michelín, estivo onte no Centro Superior de Hostelería de Galicia (CSHG) dando unha clase práctica sobre envasado ao vacío na que participaron os alumnos de Certificado de Elaboración e Xestión en Cociña. Envasar ao vacío é ideal para conservar a materia prima e manter a súa frescura durante máis tempo, un método que hoxe en día se utiliza con frecuencia na alta restauración.

A clase tivo lugar na aula de Cociña Demostración e é un complemento da formación que reciben estes futuros profesionais por parte do centro, dependente de Turgalicia, da Secretaría Xeral para o Turismo.
Pepe Solla está á fronte do restaurante Casa Solla e este ano é un dos candidatos ao III Premio Chef Millesime 2012 xunto cos cociñeiros Mario Sandoval –do Restaurante Coque en Madrid-; Paco Perez –do Restaurante Miramar en Gerona-; Francis Paniego –do Echaurren en La Rioja-; Jorge Bertón –de La Sucursal, en Valencia-; de Yolanda León e Juanjo Pérez –de Cocinandos en León-; de Kisko García –de Choco, en Córdoba- e mais de Iñigo Lavado –do restaurante homónimo en San Sebastián-.