O Diario Oficial de Galicia publica hoxe a resolución da Consellería de Cultura e Turismo pola que se incoa o expediente para a declaración de ben de interese cultural, coa categoría de monumento, en favor do convento franciscano de Santo Antonio de Herbón, no concello coruñés de Padrón. Coa incoación deste expediente procedese á apertura dun período de información pública, a fin de que cantos teñan interese poidan examinar o expediente e alegar o que estimen conveniente.O convento está situado na denominada Agra de Longara, nunha paraxe de gran beleza natural ao carón do río Ulla, bordeado por un amplo conxunto de ladeiras empinadas cara o leste e oeste. Os freires que o habitan compaxinaron dende sempre a vida monacal co traballo a prol dos peregrinos que acudían a Padrón e visitaban o Hospital de Peregrinos da vila.
Ademais de pola súa arquitectura, o complexo destaca pola súa horta, na que conviven espazos destinados á produción hortofrutícola con outros elementos ornamentais como a célebre palmeira de Palestina que, segundo a tradición, foi traída dende Xerusalén no século XV.