A Consellería de Cultura e Turismo, a través de Turgalicia, dependente da Secretaría Xeral para o Turismo, vén de publicar o folleto turístico ‘A ruta da camelia’, co obxecto de promocionar os xardíns galegos como atractivo turístico da comunidade galega. Nesta publicación, editada nos idiomas galego, castelán e inglés, inclúense 12 contornos distintos nos que o visitante poderá gozar dos mellores espazos de Galicia onde apreciar a xardinería, sobre todo a relacionada coa camelia.Entre os xardíns recollidos nesta guía turística están o Pazo de Mariñán, a Alameda de Santiago de Compostela, o Pazo de Santa Cruz de Ribadulla, o Pazo de Oca e a Casa-museo de Rosalía de Castro na provincia da Coruña; o Pazo de Rubiáns, o Pazo Quinteiro da Cruz, o Pazo da Saleta, o Pazo de Lourizán, o Castelo de Soutomaior, o Parque do Castro e o Pazo-museo Quiñones de León, na provincia de Pontevedra.
Esta nova publicación turística terá unha tirada de 20.000 exemplares na súa primeira edición e poderase atopar impreso nas oficinas de Turismo da Xunta de Galicia. Ademais, servirá para a promoción entre axentes turísticos especializados e en feiras turísticas. ‘A ruta da camelia’ pódese consultar e descargar en formato PDF dentro da páxina web do Turismo de Galicia www.turgalicia.es , no apartado descargas.