Turismo e a EGAP asinan un acordo para traballaren da man

A secretaria xeral para o Turismo, Carmen Pardo, e o director da Escola Galega de Administración Pública (EGAP), Pablo Figueroa, asinaron un acordo de colaboración para o desenvolvemento conxunto de actividades de carácter formativo, divulgador e investigador en materias relacionadas co turismo na Comunidade galega. Grazas a este convenio, trescentos profesionais da hostalaría e o turismo da Comunidade galega poden participar no programa lectivo “Português no patro, curso de português para hoteleria, turismo e atenção ao público”, que se desenvolverá ao longo de catro semanas e que foi elaborado pola Universidade de Santiago.

Ademais, segundo o acordo, o persoal da empresa pública de promoción turística poderá participar nas actividades formativas da EGAP. Ademais, ambas institucións poderán realizar de xeito conxunto cursos, xornadas, seminarios e outras actividades de divulgación. Turgalicia e a EGAP poderán editar libros, outras publicacións e documentos de traballo para fomentar o desenvolvemento turístico da Comunidade galega.