A Cidade da Cultura de Galicia vén de superar a cifra de cen mil visitantes desde a apertura ao público dos seus dous primeiros edificios, a Biblioteca e o Arquivo de Galicia, o pasado 11 de xaneiro. O conselleiro de Cultura e Turismo, Roberto Varela, asegurou que acadar cen mil visitantes en pouco máis de tres meses con só dous edificios abertos demostra “o enorme potencial da Cidade da Cultura de Galicia como foco de atracción turístico” e confirma “o interese dos galegos por coñecer unha das obras arquitectónicas mais complexas e ambiciosas do panorama internacional, que vai camiño de converterse nun dos activos turísticos mais importantes de Galicia”.O conselleiro recorda que “se está a traballar nunha programación cultural que contará con concertos, teatro, actividades infantís ou novas exposicións que fará que cada vez sexan mais as razóns para visitala”. “A cifra de cen mil visitantes non deixará de medrar”, asegura Roberto Varela, quen lembra que este ano abrirá as portas o Museo, e que, en canto as condicións de seguridade o permitan, contará cun programa de visitas guiadas.