O IGAPE promociona os produtos agroalimentarios galegos en China

Promover o coñecemento e o consumo dos produtos agroalimentarios galegos en China é o obxectivo fundamental da misión inversa, integrada por un grupo de xornalistas chineses especializados no ámbito do turismo e a gastronomía, que visitará Galicia esta semana. A iniciativa, coordinada polo Igape e o ICEX, pretende que os representantes dos medios de comunicación chineses coñezan os produtos españois de primeira man.

No caso de Galicia, o programa inclúe visitas ás cidades de Vigo, Santiago e A Coruña, nas que os xornalistas poderán visitar diversas empresa e coñecer produtos agroalimentarios galegos mediante degustacións en recoñecidos restaurantes. Entre as empresas que visitará esta delegación están Pescanova, Augas de Mondariz ou a adega de Rías Baixas Martín Códax.