Colleita "moi boa" en Monterrei

Os salóns do Castelo de Monterrei acolleron a cata de cualificación da colleita 2007 de Monterrei, que resultou ser "moi boa". Un total de dezaoito expertos foron os encargados de realizar a cualificación da colleita, catando un total de quince viños, dos que dez mostras correspondían a viños brancos e cinco a tintos.

Os catadores, con mostras cegas e mediante análise sensorial, determinaron a calidade dos viños someténdoos a un rigoroso exame. A D.O. Monterrei ampara as uvas e os viños da rexión comprendida polos concellos de Verín, Monterrei, Oímbra e Castrelo do Val e, recentemente, os de Riós e Vilardevós.

Na actualidade, esta D.O. está formada por 22 adegas e 618 viticultores. O Consello leva entregadas ata maio máis de 400.000 contraetiquetas, o que supón o 56% das vendas totais de 2006.