Ferrol protagoniza estes días unha das Semanas Santas máis interesantes de Galicia e do norte de España, recoñecida como de Interese Turístico Internacional e con máis de 25 procesións entre as que destacan coa súa sobria beleza a dos Caladiños, a do Venres Santo e a do Santo Encontro.
A cidade departamental amósase orgullosa dunha tradición renovada ano a ano, que vai gañando intensidade a medida que se achegan as súas xornadas máis importantes. Mañá, Mercores Santo, serán cinco as procesións que se celebrarán na cidade, das confrarías da Merced, Angustias, Orde Terceira e Dores, así como a do Cristo dos Navegantes, que celebra cada ano a parroquia do Socorro e que conta tradicionalmente con numerosos seguidores. Esta última será en Ferrol Vello a partir das 19.30 horas, e desde esa hora o resto dos desfiles percorrerán o barrio da Magdalena ata altas horas.
A partir de ahí, prevese que Ferrol desborde como sempre de fervor relixioso con citas imperdibles como a multitudinaria Procesión da Pontificia, Real e Ilustre Confraría da Nosa Señora das Angustias no Xoves Santo, a do Santo Encontro ou dos Caladiños o Venres Santo ou as múltiples procesións que celebran a Resurreción o Domingo.