O concello de Camariñas
pretende poñer en valor as danzas brancas, unha tradición de baile que se
remonta aos séculos XVI e XVII en ambientes mariñeiros co I Encontro de Danzas
Brancas.
Un evento que nace do xerme da “Expo Ría” e que dende a Administración local decidiron darlle un novo pulo para amplificar o seu alcance, implicar a todos os veciños e veciñas e abarcar diversos aspectos como a gastronomía, a etnografía, a música, a artesanía e o turismo. O programa festivo, que dará comezo o día 17 co pregón do actor e monologuista Cándido Pazó, reservou un importante espazo para o I Encontro de Danzas Brancas.
Estas danzas ten dúas modalidades, Arcos e Espadas. O punto de unión destas modalidades de Danzas Brancas é a cor da vestimenta. En todas, os bailaríns visten de branco, que representa a pureza. E aínda que algúns autores reivindican a orixe pagá destas danzas, a maioría coincide en que a súa orixe sitúase nos gremios de artesáns e, en moitos casos, eran froito dun voto ou promesa a un santo, comunmente á Virxe. Este tipo de danza, recuperada nalgúns municipios nos últimos anos, atrae anualmente por centos de persoas que se renden á vistosidade destes bailes tradicionais.
Na Danza de Arcos, os arcos de madeira adornados con coloristas flores de papel son movidos ao compás da música facendo distintas filigranas e formas que caracterizan este baile. Os distintos pasos con bailes denomínanse Ponte Alta, Ponte Baixa, Culebrina, Caracol, Paseo Longo e Nó.
Pola súa banda, a Danza de Espadas, concretamente a de Vilastose, rescatouse no ano 1986, despois de medio século de interrupción. Segundo explica o director desta agrupación, Gonzalo Liñeiro, a iniciativa partiu dun grupo de rapaces da zona que, grazas aos consellos dunha persoa maior que practicou esta danza antes do 36, lograron montar un grupo composto por un director, catro bailaríns con espadas e varias mulleres nas filas posteriores ataviadas cun pano branco.
Xa están á venda os tickets para as rutas mariñeiras
A oficina de Información Turística do Concello de Camariñas xa ten á venda os tickets para participar nas rutas mariñeiras que forman parte tamén da programación de "Camariñas, ou mar todo". Os visitantes e veciños poderán gozar no transcurso dos tres días de festa dunha expedición a bordo do “Joaquín Vieta”, un balandro de cabotaxe de dous paus e 18 metros de eslora construído entre os anos 1915 e 1916 que é o decano dos navíos galegos.