As descargas de polbo fresco nas lonxas galegas no que levamos de campaña case triplicaron as do ano pasado, con preto de 700 toneladas deste cefalópodo capturadas desde que comezou a campaña ata o 30 de setembro, fronte ás case 250 toneladas do mesmo período da campaña anterior. Así o adiantou esta tarde a conselleira do Mar en funcións, Rosa Quintana, tras a apertura da xornada técnica do seminario final sobre o proxecto Avaliación da pesquería de polbo en Galicia 2016, organizado pola Federación Galega de Confrarías de Pescadores.
Nesta liña, a conselleira en funcións tamén fixo fincapé no valor económico acadado na primeira venda deste produto, que esta campaña supera os 4 millóns de euros, fronte aos 1,6 da pasada. Uns datos, dixo Rosa Quintana, que reflicten o peso que ten o sector do polbo na comunidade galega, composto por 1.248 barcos con permex habilitante para o polbo e que empregan directamente a 3.000 persoas, de aí “a necesidade de protexer o recurso e preservalo para futuras campañas”, sinalou.