Buscar/Hemeroteca

viernes, 2 de septiembre de 2016

Carne con IXP Vaca e Boi de Galicia no mercado a mediados de 2017

A carne certificada coa Indicación Xeográfica Protexida Vaca e Boi de Galicia estará no mercado a mediados do vindeiro ano. Así o anunciou a conselleira do Medio Rural, Ángeles Vázquez, no decurso dunha visita ás instalacións Frigoríficos Bandeira, S.L., unha industria especializada en canais de vacún maior que poderán comercializarse no futuro baixo o novo selo. 

A conselleira estivo acompañada pola directora xeral de Gandaría, Agricultura e Industrias Agroalimentarias, Belén do Campo, e polo presidente da IXP Ternera Gallega, Jesús González, e foi recibida por Daniel Cochón e Isabel Martínez, directivos da devandita industria. 

Coa posta en marcha deste indicativo vaise mellorar a transparencia comercial e as garantías que se lles ofrecen aos consumidores en canto á calidade e á orixe do produto. A medio prazo, prevese que se acollan a esta IXP cerca de 10.000 explotacións gandeiras, se certifiquen en torno a 30.000 canais e se comercialicen máis de 10.000 toneladas de carne de vacún maior de calidade. 

O presidente de Ternera Gallega, Jesús González, destacou que o novo selo IXP Vaca e Boi de Galicia “potenciará, defenderá e poñerá en valor a carne de calidade procedente das vacas e bois da nosa Comunidade, apostando pola transparencia no sector, a trazabilidade do produto e pola súa calidade, de xeito que se acaden melloras nos prezos e se optimice a comercialización desta carne, o que repercutirá favorablemente tanto nas ganderías como nas industrias cárnicas galegas”.

No hay comentarios: