Unha
delegación da rexión italiana de Calabria visitou esta pasada semana Galicia
para coñecer de primeira man a realidade do sector marítimo pesqueiro da nosa
Comunidade. O grupo estivo formado por 8 pescadores e por representantes dos
Grupos de Acción Costeira (GAC) e do goberno rexional deste territorio do país
transalpino.
Os membros
da delegación italiana coñeceron artes de pesca selectivas, como a cacea e o
curricán, e visitaron distintos proxectos financiados polo Fondo Europeo de
Pesca nos GAC do Golfo Ártabro e de A Mariña-Ortegal.
Entre as
iniciativas seleccionadas atopábanse conserveiras artesanais de bonito e algas,
proxectos innovadores como a granxa de cultivo de corais, de turismo mariñeiro
e accións de diversificación das confrarías de pescadores, como a
rehabilitación do patrimonio dos pósitos de Miño e Pontedeume e as accións
desenvolvidas neste eido na localidade luguesa de Burela (Barco Museo Boniteiro
Rey del Carmen, actividades de
diversificación das redeiras, Restaurante A Marquesa e pescadería turística O Almacén do Peixe).
A presenza deste colectivo procedente de Italia enmárcase no proxecto de
Cooperación Transnacional “Shades”, centrado no desenvolvemento das zonas
costeiras e no que participan 6 Grupos de Acción Costeira de Calabria e outros
GAC de Lituania e Polonia, así como o galego Golfo Ártabro en calidade de
asociado.