A Denominación de Orixe
Ribeiro organiza este mércores 25 de xuño a gala de entrega dos seus
Premios, unha cita que tamén servirá como presentación da nova añada e máis do
seu novidoso plan de xestión e comunicación.
O Hotel Mosteiro de San
Clodio (Leiro, Ourense) será a sede desta xornada, que comezará ás 12:30 horas e que reunirá
destacados profesionais chegados de toda España, como adegueiros,
distribuidores, almacenistas, divulgadores e prescriptores.
Josep Roca, sumiller do restaurante El Celler de Can
Roca e divulgador das bondades dos viños do Ribeiro, recollerá o Premio "Persoeiro de Honra" desta
edición e manterá un encontro cos xornalistas interesados dende as 16.00 horas.
As outras categorías nos Premios recoñecen: "Mellor tarefa de comunicación";
"Mellor servizo de viño en restaurante"; "Mellor tenda
especializada - viñoteca"; "Mellor taberna - bar de viños";
"Mellor Viño Tinto"; "Mellor Viño Branco Colleiteiro"; e
"Mellor Viño Branco de Adega".
A presentación da nova añada de viños
do Ribeiro, co director técnico do Consello Pablo Vidal, é outro dos
atractivos dunha gala que tamén servirá como punto de partida á nova campaña de
comunicación desta Denominación de Orixe.
A D.O. Ribeiro aposta por dar
un grande impulso aos seus viños, a través dun esforzo de comunicación e
comercialización, que axude a que novos padais poidan gozar da calidade duns
viños con raigame na tradición pero coas virtudes que buscan os afeccionados
aos viños máis inquedos.
Diego López e o equipo de cociña do
Hotel Mosteiro de San Clodio que lidera Carlos
Migueiz maridarán os viños do Ribeiro con propostas
gastronómicas; López (A Muiñeira, Lalín), foi recoñecido como
"Cociñeiro do Ano" no último Fórum Gastronómico da Coruña.