O Centro Tecnolóxico do Mar-Fundación CETMAR organizou un taller de
traballo con representantes das principais empresas
comercializadoras e distribuidoras de boi de mar para darlles conta dos
resultados do estudo de mercado que sobre o consumo deste recurso e dos seus
derivados levouse a cabo en Europa dentro do proxecto ACRUNET-Rede Atlántica do
Boi de Mar.
Nesta iniciativa, financiada pola Unión Europea, a fundación galega
traballa xunto a catorce entidades e institucións de Francia, Reino Unido,
Irlanda e Portugal dos ámbitos da industria, da ciencia e da administración,
pretende como obxectivo global abordar os principais problemas aos que se
afronta o sector do boi de mar -débil demanda, caída de prezos para os
produtores, costos indirectos insostibles, promoción insuficiente-.
As conclusións dese estudo poñen de manifesto que os galegos son os europeos que máis
consumen boi de mar e os que mellor coñecen o produto. A esixencia en canto a
calidade do boi de mar é maior en Galicia que no resto dos mercados europeos,
superando así aos dos principais países produtores, como é o caso de Irlanda,
Francia e Escocia.