A cifra de viaxeiros aloxados nos
establecementos hoteleiros galegos subiu un 10,6% neste mes de xullo a respecto
do mesmo mes de 2012. En total, rexistráronse 422.810 viaxeiros. A cifra de
pernoctas neste mesmo período – con 894.505- subiu tamén nun 4,2% a respecto das
rexistradas no mesmo mes do ano pasado. De modo que, con estas cifras, Galicia continua
liderando en termos de viaxeiros o crecemento a nivel estatal, rexistrando a
porcentaxe de variación máis elevada. Ademais Galicia lidera o mercado
hoteleiro do noroeste peninsular superando o nivel de viaxeiros e pernoctacións
das comunidades da España Verde.
O bo comportamento da demanda hoteleira vén
como consecuencia dos crecementos rexistrados polos tres grandes segmentos de
mercado. Neste sentido os crecementos dos viaxeiros son do 6% para o turismo
interno, do 11% para o receptor nacional e do 15% para o internacional.
Neste mes de xullo o turismo estranxeiro acadou
máximos históricos en Galicia do peso sobre o conxunto da demanda pois supón o
24% do total, unha porcentaxe importante tratándose dun mes estival de forte
presenza do mercado nacional na nosa comunidade.
A ocupación hoteleira sube en case dous puntos
porcentuais situándose no 39,07% da media no conxunto da comunidade.
Se se teñen en conta os datos dos primeiros sete
meses de 2013 a respecto do mesmo período do 2012, a cifra de viaxeiros
aloxados nos establecementos hoteleiros de Galicia ten subido un 3,4% rexistrando
preto de 1,8 millóns nos primeiros sete meses do ano. A nivel estatal Galicia
rexistra a segunda taxa máis elevada de crecemento da cifra de viaxeiros
aloxados por detrás de Navarra.