Galicia é a comunidade autónoma española na que máis medrou o número de establecementos e servizos turísticos certificados coa marca Q de calidade turística en 2011. Ao longo dos últimos doce meses houbo 43 novas incorporacións, o que supón que o territorio galego teña xa 234 empresas turísticas con este distintivo.A Xunta destaca, a este respecto, o feito de que Galicia é a comunidade autónoma con meirande número de aloxamentos turísticos (hoteis, casas de Turismo Rural e cámpings) certificados, cun total de 106 dos 771 que hai en toda España. Galicia é ademais o territorio con máis establecementos rurais certificados (60 de 216 do total español), o que significa un 27 por cento do conxunto estatal.
Galicia pecha o ano, pois, con 44 hoteis, 60 establecementos de Turismo Rural, 7 balnearios, 2 cámpings, 2 pazos de congresos, 9 praias, 43 servizos de restauración, 56 axencias de viaxe, 4 empresas de Turismo Activo, un campo de golf e 6 instalacións náutico-deportivas certificadas coa marca Q.