A Consellería do Medio Rural traballa a prol da excelencia e conquista de novos mercados para o sector vitivinícola galego, co fin de impulsar e promover a calidade diferenciada dos seus caldos. Así o manifestou o titular deste departamento autonómico, Samuel Juárez, na inauguración oficial do ‘IV Evento Interrexional WINETech’, celebradO en Santiago de Compostela.Samuel Juárez incidiu na importancia deste sector como peza clave do complexo agroalimentario galego, que está articulado fundamentalmente en torno ás cinco denominacións de orixe existentes. Pero ademais, engadiu, trátase dunha actividade económica que actúa -en moitos casos- como importante complemento de rendas no medio rural, xa que o viño é o primeiro produto en importancia do subsector agrícola galego que contribúe con máis do 10% ao conxunto da Produción Final Agraria de Galicia.
Na Comunidade galega a industria vinícola representa máis do 4% da facturación da industria agroalimentaria superando, no ano 2010, os 150 millóns de euros. O sector conta con preto de 650 adegas que dan emprego directo a máis de 1.000 traballadores, sendo a maioría instalacións de pequeno tamaño, de xeito que máis do 90% teñen menos de 6 traballadores e só o 1% empregan a máis de 25 traballadores. Tamén é importante sinalar que máis do 90% das instalacións están en zonas rurais, supoñendo as adegas case un terzo dos establecementos agroindustriais á vez que absorben o 10% do emprego total da agroindustria.