A S.A. de Xestión do Plan Xacobeo está a desenvolver, ata o 25 de novembro, unha campaña de promoción e posta en valor do Camiño de Santiago en Australia, no marco dunha misión comercial organizada pola Cámara de Comercio, Industria e Navegación de Vigo e na que tamén participa institucionalmente a Universidade de Santiago de Compostela. A directora xerente do Xacobeo, Camino Triguero (foto) encabeza a representación institucional da Xunta nesta campaña na que empresarios do sur de Galicia buscan abrir novos mercados. A responsable da entidade pública encargada da conservación e promoción das rutas xacobeas tentará acrecentar o interese que as peregrinacións veñen suscitando no sur asiático. Desde o ano 2004, no que se rexistraron oficialmente 480 peregrinos australianos, a progresión de Australia é constante na clasificación de nacións que máis peregrinos aportan, ocupando actualmente o posto número 16, xusto detrás de Corea. No presente ano 2011 xa recolleron a súa Compostela 1.388 peregrinos australianos.Nesta acción promocional da marca Xacobeo en Australia, a directora xerente reunirase co director do Instituto Cervantes en Sidney, responsables da Universidade Nacional de Australia en Camberra, titulares do departamento de español en Melbourne e diversos centros culturais e oficinas consulares españolas. Camino Triguero tamén impartirá diferentes charlas nas que exporá o concepto e historia das peregrinacións a Santiago e a súa universalización e actualidade para responder á espectacular expectación que o fenómeno xacobeo está a suscitar en Australia e en toda Asia en xeral.