A directora xeral de Innovación e Industrias Agrarias e Forestais da Consellería do Medio Rural, Alejandra Álvarez de Mon, clausurou hoxe a X Cata de Meles e a XIV Cata de Queixos de Galicia, nas que concursaron 21 meles -das cales 5 delas eran monoflorais e 16 multiflorais- pertencentes a 16 industrias envasadoras da indicación xeográfica protexida Mel de Galicia, e un total de 56 queixos, dos cales 25 eran da denominación de orixe protexida (D.O.P.) Queixo Tetilla, 17 de Arzúa-Ulloa, 11 de San Simón da Costa e 3 do Cebreiro.Entre os diferentes catadores encargados de elixir aos mellores meles e queixos do 2011, estaban o director e condutor do programa da Radio Galega “Come e Fala”, Xosé Manuel García; a doutora en Farmacia e profesora de Hixiene, Nutrición e Dietética no CSHG, María Elena Álvarez Piñeiro; o xornalista e escritor gastronómico Miguel Vila Pernas; ou a enxeñeira agrícola de Industrias Alimentarias, Mariela Barca Villarta, entre outros numerosos especialistas do sector.
O nome dos premiados farase público o mesmo día da entrega de galardóns, que se realizará nun acto presidido polo presidente da Xunta de Galicia, Alberto Núñez Feijoo, e acompañado polo conselleiro do Medio Rural, Samuel Juárez. Será no mes de decembro, no concello coruñés de Melide.