O número de afiliados á Seguridade Social en actividades relacionadas co turismo acadou no pasado mes de setembro un total de 71.854, 46.627 segundo o réxime xeral e 25.227 segundo o réxime de autónomos, o que supón en canto á variación interanual, un incremento de 427 afiliados máis en relación a setembro do pasado Ano Santo 2010.Segundo os datos facilitados polo Ministerio de Traballo e Inmigración, por ramas de actividade aquela que amosa un maior peso é a de servizos de comidas e bebidas, con 60.529 persoas (37.187 segundo o réxime xeral e 23.342 segundo o de autónomos), que ademais significa un 84,24% do total de afiliados en actividades turísticas (79,75% para o réxime xeral e 92,53% para o réxime de autónomos).
No caso dos servizos de aloxamento rexistrouse un total de 9.638 afiliados (8.187 segundo o réxime xeral e 1.451 baixo o réxime de autónomos), o que representa un 13,41% do total de afiliados nas ramas turísticas (un 17,56% no caso do réxime xeral e 5,75% no caso de réxime de autónomos).
Os afiliados en actividades de axencias de viaxes, operadores turísticos, servizos de reservas e actividades relacionadas con estes foron 1.687 (1.253 segundo a modalidade de réxime xeral e 434 segundo a de autónomos), cun peso do 2,35% sobre os afiliados nas ramas turísticas (2,69% no réxime xeral e 1,72% no réxime de autónomos).