Máis protección para monumentos galegos

A Consellería de Cultura e Turismo, a través da Dirección Xeral do Patrimonio Cultural, vén de aprobar a resolución de incoación do expediente para a declaración BIC do Castro Baroña, en Porto do Son. O conselleiro, Roberto Varela, asegura que a incoación do expediente é “un paso decisivo, xa que dende a súa publicación oficial vai garantir a máxima protección para o Castro de Baroña, un dos xacementos da cultura castrexa mellor conservados de Galicia”. A declaración BIC será efectiva antes de que remate o presente ano.

Ademais, o Consello da Xunta informou da incoación do expediente de declaración como Ben de Interese Cultural do santuario da Nosa Señora do Refuxio a Divina Peregrina en Pontevedra. A resolución conleva, entre outras medidas, a suspensión das correspondentes licencias municipais de parcelación, edificación ou demolición nas zonas afectadas pola declaración, así como dos efectos das xa outorgadas. O Santuario foi levantado nuns terreos cedidos no seu momento polo Concello de Pontevedra á Confraría da Peregrina fóra das murallas da cidade medieval e é un fito de gran importancia dentro do Camiño Portugués.